 |
 Ka
patur kritika se KFOR-i nuk ka qenë në nivel
të detyrës |
Botuesi i të përditshmes Koha Ditore,
Veton Surroi, thotë se zhvillimet e fundit në Kosovë po
forcojnë obsionin e ndarjes së saj. Seladin
Xhezairi bisedoi me zotin Surroi dhe fillimisht e pyeti
se si e vlerësonte ai këtë përshkallëzim
më të ri të dhunës ndëretnike?
Zoti Surroi : Unë mendoj se
kemi të bëjmë me një krizë të përgjithshme
të modelit qeverisës në Kosovë i
cili ka sjellë në stagnim dhe i cili, fatkeqësisht,
fillimisht krijoi momentin që një incident,
një shprehje e dhunës të akumulojë kaq
energji shkatërruese. Më pastaj, unë besoj
që kemi mbërritur edhe në fazën
e dytë kur kjo dhunë është e
dirigjuar dhe organizuar qartazi. E organizuar me
pretendime që, nga njëra anë të frikësojë popullatën
serbe dhe ta dëbojë atë nga pjesa
e Kosovës qendrore, duke shkatërruar edhe
objektet religjioze serbe dhe, nga ana tjetër
të drejtojë mllefin e popullatës kundër
UNMIK-ut dhe KFOR-it, gjëra këto deri tani
absolutisht të pa paramendueshme.
BBC : Në këtë rrafsh,
shtrohet edhe çështja e përgjegjësisë të faktorit
ndërkombëtar ashtu dhe e institucioneve
vendore. Ishin në nivel të detyrës
këto organizma apo?
Zoti Surroi :Absolutisht jo. Është shumë e
qartë dhe kritikat që i bëhen UNMIK-ut ç'prej
kohësh, për zvarritje e të tjera nuk
janë marrë parasysh. UNMIK-u mendon ende
se mund të kontrollojë situatën, kurse
kjo gjendje tregoi se nuk mund ta kontrollojë atë.
Por, po ashtu u tregua se në Kosovë nuk
ka as autoritet politik e as autoritet institucional
vendor i cili, gjithashtu, do ta merrte situatën
në dorë, kështu që kemi pasur
gjatë 72 orëve të fundit shprehje
të qartë të anarkisë.
BBC : Zoti Surroi, sa janë të qëndrueshme
arsyetimet e përfaqësuesve të institucioneve
vendore se nuk mund të kërkohet përgjegjësi
prej tyre sepse, sikundër thonë, nuk kanë kompetenca?
Zoti Surroi : Kjo është pjesërisht
e vërtetë, por po ashtu është pjesa
tjetër e së vërtetës që këto
institucione nuk kanë demonstruar as invencion
politik, as energji, as vullnet të mjaftueshëm,
që të marrin kompetenca. Dhe, është shumë vështirë që këtyre
institucioneve të zbehta dikush t'u japë diçka
kur nuk shihet se e meritojnë shumë.
BBC : Karshi kësaj, zyrtarë të lartë serbë,
krahas riangazhimit për kantonizimin apo ndarjen
e Kosovës, këto ditë kanë lënë të kuptohet
qartë se janë të interesuar për
rikthimin ushtarako-policor në Kosovë.
Si e shikoni këtë disponim të palës
serbe?
Zoti Surroi : Kthimi ushtarako-policor është formë presioni
ndaj UNMIK-ut, ndaj bashkësisë ndërkombëtare
dhe ndaj vetë kosovarëve për të përfituar
nga kjo gjendje. Regjimi serb, jo vetëm ky,
por që prej Milosheviqit, pra kjo është qeveria
e tretë, reagon pothuajse në formë të njëjtë konceptuale,
për ruajtje - mbajtjen e institucioneve paralele,
për të instrumentalizuar popullatën
serbe në Kosovë kundër administrimit
ndërkombëtar dhe kundër ngritjes institucionale
kosovare dhe për mbajtjen e ndarjes fizike të Kosovës
si një pozicion negociator në negociatat
e ardhshme rreth statusit, në mënyrë që të pengohet
pavarësimi i plotë i tërësisë tokësore
kosovare.
BBC : Dhe, kur është fjala
për këtë, mendoni se këto zhvillimet
e fundit do të zvarrisin ose përshpejtojnë bisedimet
për statusin përfundimtar të Kosovës?
Zoti Surroi : Është problemi
i faktorit kohë, por njëri prej problemeve
i cili del tani në sipërfaqe, pas kësaj
dhunës së këtyre ditëve, është se
gjithnjë e më fuqimisht do të forcohet
obsioni i ndarjes së Kosovës, pikërisht
për shkak të dëbimit të popullatës
serbe me dhunë nga Kosova qëndrore dhe
ky do të jetë njëri prej problemeve
shumë të theksuara edhe në marrëdhëniet
Kosovë-Serbi, por edhe në formën e
ndërhyrjes së bashkësisë ndërkombëtare
për zgjidhjen e statusit përfundimtar të Kosovës. |
