[an error occurred while processing this directive]
[an error occurred while processing this directive]
Argëtim
Kush ma vodhi dashurinë?

Në netët pa gjumë, mes lotësh, e pyesja veten: „Ç’femër është ajo që pa pikë ndërgjegjeje ma vodhi burrin, që ma shkatërroi martesën dhe jetën time? Ajo m’i la fëmijët të rriten pa dashurinë e babait.“
„E unë,budallaqja, mendoja se e kisha mike dhe ia besaoja të gjitha problemet e mia.“

Prita, me dy fëmijët, ishte në vizitë te prindërit, kur burri i saj gjeti dashnore, për shkak të së cilës braktise atë dhe fëmijët.
„Në një vend të vogël, të fshehtat s’qëndrojnë gjatë“, thotë ajo e mllefosur. Edhe unë, kur u ktheva nga prindërit, dëgjova thashethemet: flitej për burrin tim dhe Betin, fqinjën tonë, të cilën e njihja, por s’kishim shkëmbyer ndonjë fjalë bashkë. Por, unë s’besoja në ato thashetheme mendoja se jetoja me një burrë serioz dhe të ndërgjegjshëm, që ishte 12 vjet më i vjetër se unë dhe kishim dy fëmijë.
Që të ma hiqte dyshimin, ai më njohu me Betin dhe ajo vinte shpesh në shtëpinë tonë. S’kishte fëmijë dhe burri i saj kishte një punë të tillë që me javë të tëra ishte jashtë shtëpisë. Edhe mua më pëlqeu kjo shoqëri, se isha e re në atë qytet dhe s’kisha shoqe.

„Të urrej, e dua tjetrën“, më tha

E dija se burri im kishte dashnore, këtë ma thoshin të gjithë, por nuk e dija kush ishte ajo grua që po e shkatërronte jetën time, fëmijërinë e fëmijëve të mi. Për Betin tash as që më shkonte mendja, mendoja se e kisha mike. Kurse burri, bëhej çdo herë e më i ashpër, më agresiv. Për fëmijët s’kujdesej fare, e mua më maltretonte për çdo imtësi. Shpesh më drejtohej: „Të urrej, ik nga shtëpia ime, e dua tjetrën, ajo është jeta ime“.
Edhe unë shkoja te Beti. Ajo ishte e mirë me mua dhe me fëmijët, por nganjëherë bëhej ironike dhe e pafytyrë. Dyshimi më brente përbrenda dhe në një rast s’durova e i thashë: „Ti je ajo, ti ma bëre jetën ferr.“ Por, ajo e qetë ma ktheu: „Kurrë s’do të ta bëja këtë, të dua ty dhe fëmijët. Unë kam burrin tim që s’do ta humbja për asgjë në botë“.
Fjalët e saj më qetësuan pak, por me burrin më nuk gjeta gjuhë të përbashkët. Kur linda djalin e tretë, kisha shumë punë, e burrit as që i binte ndërmend të më ndihmonte, s’rrinte fare në shtëpi. Më s’jetonim si burrë e grua, por unë prisja me durim, duke menduar se e gjithë kjo do të kalojë dhe ai do të më kthehej prapë.

I zura në befasi

Natën e Vitit të Ri më tha: „Ky është viti i fundit që e kalojmë bashkë, largohu nga jeta ime“. Vetëm Zoti e di se sa vështirë është t’i dëgjosh dhe t’i durosh këto fjalë. Ç’është më e keqja, Betit nisa t’i rrëfeja për problemet e mia me burrin. Dikur vendosa të zbuloja kush ishte ajo grua. I telefonova Betit dhe kur kuptova se ajo s’ishte në shtëpi, shkova para derës së saj dhe prita. Dikur para shtëpisë së saj, u ndal një veturë: ishte e burrit tim. Doli Beti e veshur me fustan mini dhe me shminkë të prishur. Dukej si prostitutë. Tani e kisha të qartë. U ktheva në shtëpi e zhgënjyer, s’besoja se burri im kishte zgjedhur Betin. Ajo ishte e shëmtuar. Ç’kishte gjetur tek ajo? Ç’mund t’i ofronte ajo më shumë se unë? Kur mendova më mirë, e kuptova shkakun.
Unë isha e lodhur dhe nervoze, kisha tre fëmijë të vegjël, e kujdesesha edhe për vajzën e tij nga martesa e parë dhe s’kisha kohë t’i dhuroja çaste epshndjellëse dhe t’ia përkedhelja sedrën.

Na braktisi përgjithnjë

Atë ditë që e zura me Betin, pasi s’mundi të më përzente mua, ai na braktis dhe mori banesë tjetër. Atë natë qava si asnjëherë në jetën time. E dija se më s’kam burrë, se ai kurrë më s’do të kthehej, se fëmijët e humbën babanë përgjithmonë. Si nuk i puthi për herë të fundit? E dija se Beti kishte shkatërruar gjithë dashurinë që ai kishte pasur për mua, por se t’i harronte edhe fëmijët për shkak të saj, kurrë s’kam besuar.
Tani jetojnë bashkë. Edhe atë e braktisi burri. S’është lehtë të jetohet me gjithë atë përvojë të hidhur, por për fat kamë fëmijët, të cilët janë qëllimi dhe lumturia ime.

F. B.

[an error occurred while processing this directive]
[an error occurred while processing this directive]