Gezim
Mekuli-Demilitarizimi,
decentralizimi, dekombëtarizimi dhe "demokratizimi" i
popullit shqiptar! Beqir
Elshani-Saturni
serb i ha femijet shqiptare Abaz
Pllana-Mitrovica
e ndarë apo...? Beqir
Elshani-Ditelindja
dhe perkujtimiXhevat
Bislimi- Konference
per gazetare-Dega e PDK-se-VitiAKTUALITETE -EXKLUSIVE PËR RTVZIK |
AKTUALITET |
Abdylhadi Veseli -Kryetar i PPD Partisë i duhet edhe "gjak" i ri, por jo vetëm njerëz që kanë themeluar dhe e kanë udhëhequr gjatë këtyre viteve. Kjo parti ka të dhëna për ata të cilët e përkrahnin partinë që doli nga lufta, se tashmë janë kthyer dhe e përkrahin PPD-në. Pozicionet e partisë dobësoheshin me vetëdije vetëm e vetëm që të mbrohet UÇK-ja dhe të ndërkombëtarizohet para faktorit ndërkombëtar. Partia në pushtet (BDI-ja) duhet të jetë paksa më guximtare në institucione dhe nuk duhet të lejojë që të tjerët të thonë se "ne jemi zot të vendit që quhet Maqedoni", por edhe shqiptarët duhet të jenë ata që do t'i dalin zot hises së vet Intervistoi-Artan ARSLLANI LOBI: Zoti Vejseli, cili ishte motivacioni që ju shtyri të merrni pozicionin numër një në PPD, kur dihet se kjo parti ende ka një reiting të ulët në elektoratin shqiptar? VEJSELI: Nuk ishte ndonjë motivacion personal, por ishte një kërkesë e anëtarësisë dhe simpatizantëve të PPD-së. Në situatën kur erdha në krye të partisë, atë e gjeta në një gjendje të vështirë, duke pasur parasysh edhe reitingun partiak në mesin e shqiptarëve të Maqedonisë, mirëpo kisha besimin e plotë se me ardhjen time në kreun e partisë dhe me përdorimin e mekanizmave për integrimin e të gjitha strukturave të partisë që nga themelimi i saj, konsideroj se do të ishte një formulë shpëtimtare për partinë që të ngremë atë në një shkallë të cilën ajo e meriton. Në këtë drejtim, pas zgjedhjes sime në postin e kryetarit, pati një takim me ish-liderët e kësaj partie, ata të cilët e themeluan dhe ata të cilët udhëhoqën partinë në këto vite të kaluara. Mendoj se këtu patëm një bisedë konstruktive, ku ata që udhëhoqën partinë treguan gatishmërinë që ta ndihmojnë atë edhe në periudhën e ardhshme, dhe në këtë situatë në të cilën gjendemi, duke pasur parasysh jo vetëm përkrahjen e ish-liderëve të partisë, por edhe të strukturave të tjera, ashtu siç janë duke u ngjeshur radhët e saj me figura të dëshmuara të partisë, që për një afat kohor, për shkaqe objektive apo subjektive, u pasivizuan dhe nuk ishin aktivë, ata tash i janë afruar asaj. Partia tash ka një lëvizje brenda për brenda, duke filluar nga Likova deri në Ohër, gjë që nuk ka ardhur vetëm si kontribut i kryetarit, por edhe i kryesisë dhe strukturave të tjera të partisë, edhe me mbështetje të plotë të anëtarësisë dhe simpatizantëve. LOBI: Një nga vërejtjet që i janë bërë kryetarit paraprak ishte edhe "luhatja" e tij në rrafshin e bashkëpunimit herë me BDI-në e herë me PDSH-në. Cili do të jetë orientimi juaj në këtë aspekt? VEJSELI: Orientimi im është i qartë, të cilën gjë e kam thënë edhe në konferencën e promovimit. Ne kemi programin e partisë dhe puna do të mbështetet në të. Do të respektohen parimet themelore të programit dhe platformës politike të saj, për shkak se ajo i ka të gjitha cilësitë dhe ka dalë nga gjiri i popullit, ndaj dhe nuk ka nevojë të ndryshohet. Se kjo vlen, mund të shihet edhe në programet e partive që pasuan, të cilat kanë ngjashmëri me programin tonë, ku kihet parasysh interesi i shqiptarëve në RM. Një kohë të gjatë ishim të akuzuar, sidomos nga opozita e mëparshme shqiptare, por edhe nga të tjerët, se PPD nuk ka ndonjë proviniencë të qartë politike, apo nuk ka politikë koherente e stabile, por ne kemi dëshmuar politikën tonë duke mos ndryshuar rrugën e veprimit politik nga ajo që është bazë në programin e partisë, ndërsa gjithë të tjerët që na akuzonin, tash po shkojnë rrugës që e kishte trasuar PPD-ja. Me këtë rast, po përsëris se ne jemi të hapur për bashkëpunim me të gjitha partitë politike, sidomos ato shqiptare, por do të bashkëpunojmë me ato që do të jenë të sinqerta, që nuk do të bëjnë shantazhe, që do të bëjnë një bashkëpunim pa hile. Në të kundërtën, nuk jemi të gatshëm që edhe më tutje të bashkëpunojmë në dëm të PPD-së, sepse parësore për këtë parti është promovimi dhe mbrojtja e interesave kombëtare. Ne kemi rrugën e qartë: arritjen e barazisë qytetare dhe nacionale në RM. LOBI: Nuk ka mbetur shumë kohë deri në zgjedhjet e ardhshme lokale, që do të mbahen nga mesi i muajit mars. Cila do të jetë motoja dhe orientimi politik i kësaj partie për të tërhequr një numër sa më të madh votuesish? VEJSELI: Ekspertët e PPD-së janë duke punuar në platformën e saj zgjedhore dhe ajo do të jetë shumë afër interesave të qytetarëve të RM-së. Meqë këto janë zgjedhje lokale, do të duhet të hartojmë një platformë që do të jetë konform shqetësimeve konkrete të jetës së përditshme të qytetarëve, siç është infrastruktura, politika sociale, sidomos zbutja e papunësisë, ndërkohë që pushteti lokal do të fitojë edhe kompetenca për zhvillimin e ekonomisë. Kjo platformë zgjedhore së shpejti do të jetë publike për opinionin, ku janë inkorporuar edhe projekte ekonomike, në bashkëpunim me faktorët ndërkombëtarë, për të dalë nga kjo situatë e krizës në të cilën gjendemi. LOBI: Në këtë moment, cilat janë kapacitetet e kësaj partie për t'i fituar postet e kryetarit komunal në ndonjërën nga komunat shqiptare? VEJSELI: Këtu nuk do shumë filozofi. Kapaciteti i çdo partie varet nga mbështetja që do të kishte nga anëtarësia dhe elektorati. Nëse marrim parasysh anketat që bëhen kohëve të fundit, do të shihet se një numër bukur i madh i qytetarëve është i papërcaktuar, për shkak se elektorati ka humbur besimin te pushteti qendror dhe ai lokal, si dhe te partitë politike. Kjo ka ndodhur për shkak të mospërmbushjes së premtimeve që po i japin partitë politike, organet qeveritare dhe pushtetmbajtëse, kur është fjala për përmirësimin e kushteve të jetesës dhe standardit të qytetarëve. Për këtë dëshmon fakti se për një kohë të shkurtër shkuan nga postet e tyre tre kryeministra, të cilët premtonin shumë, por realizimi ishte fare i vogël për shkak të paaftësisë së tyre. Së këndejmi, mendoj se PPD-ja ka një potencial të duhur intelektual dhe kadrovik që t'u dalë në ndihmë nevojave të qytetarëve, si në aspektin e zhvillimit ekonomik, ashtu edhe të sigurisë etj. Nëse vazhdojmë të punojmë konform këtyre kërkesave, mendoj se do ta fitojmë besimin e qytetarëve, të cilët kësaj radhe do të kenë kandidatë me aftësi organizative dhe udhëheqëse në pushtetin lokal. Kjo parti do t'i detektojë njerëzit e vërtetë për bartës të këtyre funksioneve në zgjedhjet e ardhshme lokale si kandidatë të mundshëm. LOBI: Mendoni se mund të arrini më shumë në këto zgjedhje nëse hyni në koalicion me partitë e tjera shqiptare? VEJSELI: Nëse gjithë shqiptarët kanë interesa të përbashkëta, edhe përkundër faktit se ata u takojnë partive të ndryshme, atëherë gjatë zgjedhjeve duhet t'i bashkojnë forcat për të marrë numrin e merituar të posteve. Por, ne jemi në pluralizëm, kemi interesa të ndryshme politike, kështu që kur vijnë në pyetje këto interesa, atëherë ndodh që të ketë edhe ndarje. Parimi i pluralizimit dhe demokracisë është që të ketë më shumë kandidatë, që të mund të kenë qytetarët një ofertë më të madhe për zgjedhjen e kandidatit më të mirë. Nëse do të kishte zgjedhje fer dhe demokratike, nëse nuk do të përdorej dhuna dhe falsifikimi, nuk ka asgjë të keqe që të ketë më shumë kandidatë dhe njerëzit të kenë më shumë obcione. Mirëpo, duke pasur përvojën e hidhur në periudhën e kaluar, kur vota shqiptare dhunohej, jo nga shqiptarët, por nga bandat e ndryshme të organizuara nga partitë politike, atëherë me siguri se do të kemi pakënaqësi në radhët e qytetarëve. Shqiptarët duhet të dëshmojnë edhe para faktorit ndërkombëtar se nuk janë destabilizues, se dinë të votojnë. Ne ngritëm një iniciativë në një samit të mbajtur në Mavrovë nga ana e Ambasadës zvicerane për çështje ndëretnike, që partitë politike shqiptare të nënshkruajnë një kodeks zgjedhor për të garantuar se këto zgjedhje lokale do të jenë fer dhe demokratike, se nuk do të përdoret dhuna. Nëse ndodh kjo, shqiptarët do të dëshmohen se janë demokratë dhe të civilizuar, për ta hequr etiketën që e kanë marrë nga disa faktorë dashakeq të jashtëm dhe të brendshëm. LOBI: Cilat janë mekanizmat politikë që do t'i përdorni për ta kthyer elektoratin dikur mjaft të madh që e ka pasur kjo parti? VEJSELI: Jemi në prag të zgjedhjeve, ndaj dhe kemi filluar me mbajtjen e tubimeve informative në disa qytete të RM-së dhe jemi të kënaqur nga mbështetja që e kemi nga qytetarët, si në Karshiakë, Kumanovë, Gostivar etj., ku deri tash i kemi mbajtur dhe me siguri edhe në vende të tjera ku do t'i mbajmë ato. Gjëja e parë që duhej të ndodhte, ishte integrimi i të gjitha strukturave të partisë, me qëllim të konsolidimit të saj. Partisë i duhet edhe "gjaku" i ri, jo vetëm njerëz që kanë themeluar dhe e kanë udhëhequr gjatë këtyre viteve, gjë që ka ndodhur kohëve të fundit, kurse kjo do të vazhdojë edhe më tej. Nuk do t'i lëmë anash edhe angazhimet tona në segmentet e tjera, siç është pushteti qendror, përfaqësimi ynë në Parlament, nëpërmjet deputetëve, si dhe nëpërmjet aktivistëve dhe Kryesisë qendrore, duke i përshëndetur gjithherë projektet të cilat janë të dobishme për shqiptarët, por duke i kundërshtuar ato që janë në dëm të tyre. LOBI: Në këtë periudhë të shkurtër që jeni në krye të partisë, keni fituar përshtypje se ekzistojnë grupacione brenda strukturave të saj? VEJSELI: Them me plot bindje se grupacione të tilla tashmë nuk ekzistojnë në këtë parti.
LOBI: Cili është mendimi juaj për përgatitjet rreth zhvillimit të zgjedhjeve të ardhshme lokale. Mendoni se mund të ketë vjedhje votash dhe incidente të armatosura? VEJSELI: Këto zgjedhje duhet ta tregojnë nivelin tonë si shqiptarë për zgjedhje fer dhe demokratike, sepse këtë e kërkon edhe koha dhe duhet të jetë prioriteti ynë. Mendoj se duhet të kemi një marrëveshje mes subjekteve politike shqiptare, se në ditën e votimit nuk duhet të dhunohet vota nga grupet e ndryshme dhe nëse dëshirojmë zgjedhje të rregullta, këtë mund ta bëjnë liderët e partive politike. Nëse ata dërgojnë mesazh tek elektorati shqiptar, ky do të mund të kapej ashtu si duhet, kurse mesazhi konsiston me kundërshtimin e dhunës në votime, pra le të fitojë ai që është më i miri, ndërsa ne duhet t'ia zgjasim dorën për këtë. Është rasti i mirë që tash t'i tregojmë edhe faktorit të jashtëm se jemi duke punuar për interesat tona, që nënkupton edhe zgjedhjet korrekte dhe demokratike. Këtë nuk duhet ta bëjmë vetëm deklarativisht, por edhe në mënyrë praktike. Në të kundërtën, pasojat do të duken më vonë, sepse kandidati i zgjedhur" nuk do ta kishte përkrahjen e duhur të popullatës, ngase do të jetë i zgjedhur nga ndonjë grup i interesit, me mbushjen e kutive të votimit. Kosova është e gatshme për pavarësi
|
LOBI: Viti 2005 do të jetë shumë i rëndësishëm për shqiptarët, sidomos për ata në Kosovë. Cili është mendimi juaj për statusin e ardhshëm të Kosovës? VEJSELI: Është e vërtetë që ky vit është mjaft i rëndësishëm për shqiptarët, për shkak se Kosova është pjesë e gjithë shqiptarëve, kudo që jetojnë. Mendoj se nga mesi i vitit 2005 do të zgjidhet statusi final i Kosovës dhe të gjitha vlerësimet janë se Kosova është duke i përmbushur standardet, të cilat janë të parapara nga ana e bashkësisë ndërkombëtare. Mendoj se Kosovës i takon statusi i pavarësisë, për shkak se ajo ka arritur një shkallë të zhvillimit të pavarur në fushën e sigurisë, ekonomisë, si dhe në ato të tjera të politikës sociale etj., ka një ngritje të vetëdijes në funksionimin e institucioneve. Kemi madje një dallim në shkallën e funksionimit të institucioneve mes Maqedonisë dhe Kosovës, sidomos në sferën e korrupsionit, që po merr përmasa shqetësuese në Maqedoni. Besoj se Kosova do ta fitojë pavarësinë, kurse viti 2005 do të jetë pikërisht vit i rrumbullakimit të kësaj pavarësie. LOBI: Në ç'masë i ka detektuar kjo parti shkaqet për dobësimin e saj dhe cilat ishin mangësitë në organizimin e saj politik? VEJSELI: Kjo parti ishte e vetëdijshme për faktorët që do të ndikojnë së pari në humbjen e saj në zgjedhjet parlamentare të vitit 2002, gjë që kishte ndodhur ashtu si ndodhi. Ashtu ndodhi, sepse PPD-ja nuk e mbrojti interesin partiak nga viti 2001 e këndej, por edhe më herët, por sidomos me paraqitjen e UÇK-së në RM, PPD-ja u bë faktor kyç i mbështetjes. Ne me vetëdije i dobësonim pozicionet e partisë vetëm e vetëm që ta mbrojmë UÇK-në, që të ndërkombëtarizohet para faktorit ndërkombëtar. Kjo parti luajti një rol të rëndësishëm për të thënë të vërtetën për UÇK-në, se janë kryengritës shqiptarë që kanë dalë nga gjiri i popullit dhe jo siç të tjerët ngjitnin epitete të ndryshme jopërfillëse. Lirisht mund të thuhet se PPD-ja ishte krahu i djathtë i kësaj ushtrie, ndaj dhe duke dalë BDI-ja nga formacionet luftarake, PPD-ja si përkrahëse e saj, me vetëdije i dobësoi pozicionet. Ne na brengos fakti se atë që kemi besuar se do të ndodh me shqiptarët e Maqedonisë, tash pas më shumë se dy vjetësh ende nuk po ndodh, punët përsëri vazhdojnë me avazin e vjetër dhe ne që dhamë përkrahjen kësaj strukture, jemi duke punuar në projekte konkrete që të ringrisim PPD-në. Madje, brenda partisë ka pasur edhe fraksione, të cilat tashmë nuk ekzistojnë, sepse ato i kemi afruar rreth Kryesisë së partisë, si forcë që do të punojë për të mirën e të gjithëve. Kemi të dhëna që ata të cilët e përkrahnin partinë që doli nga lufta, tashmë janë kthyer dhe e përkrahin PPD-në. Tash njerëzit kanë një rast të mirë që të bëjnë krahasim mes partive shqiptare, sepse ishte në pushtet PPD-ja, pastaj erdhi PDSH-ja, kurse tash është BDI-ja dhe mund ta ndajnë të mirën nga e keqja, se cila ishte partia që diti t'i mbrojë interesat e shqiptarëve në Maqedoni.
Vija e demarkacionit, me bekimin e Prishtinës
LOBI: Në këtë vit pritet të bëhet demarkacioni i vijës kufitare mes Kosovës dhe Maqedonisë. Mendoni se do të mund të ketë probleme në këtë drejtim?
VEJSELI: Kur është fjala për demarkacionin e vijës kufitare me Kosovën, dihet se PPD-ja ka qenë e para që e ka kontestuar marrëveshjen mes Shkupit dhe Beogradit, duke theksuar se e ka gabim Maqedonia nëse mendon të bëjë marrëveshje me një shtet inekzistent, siç ishte ish-Jugosllavia, si dhe një shtet që nuk ka jurisdiksion mbi Kosovën. Prandaj, marrëveshja duhet të jetë mes Shkupit dhe Prishtinës dhe assesi me Beogradin. Asokohe, për këtë vërejtje të PPD-së nuk kishin sens politikanët maqedonas që të reteronin dhe të fillonin biseda mes Shkupit dhe Prishtinës, gjë që më vonë edhe ndodhi. Vija e demarkacionit duhet të bëhet dhe sigurisht se ajo duhet të implementohet në pajtueshmëri të dyanshme. Nuk mendoj se në këtë rrafsh mund të ndodhin incidente nëse do të pranoheshin edhe sugjerimet e qytetarëve në brezin kufitar, që ata lirshëm të qarkullojnë, duke hapur më shumë pika kufitare. LOBI: Cili është pozicioni i forcave politike në Maqedoni dhe gjasat e tyre në zgjedhjet e ardhshme lokale? VEJSELI: Si kryetar i një partie s'dëshiroj të japë vlerësime të tilla, sepse mendoj që këtë më së miri do të dijë ta bëjë vetë elektorati shqiptar në Maqedoni, se cilin do ta votojë dhe kujt do t'ia japë mandatin për pushtet lokal, megjithqë pritet që për këtë do të duhet të mendohet mirë. Eklektorati kësaj radhe nuk do të gabojë lehtë dhe do të përcaktojë se cila do të jetë forca kryesore politike e shqiptarëve këtu.
LOBI: Në ç'masë ka arritur të kryejë funksionin e vet BDI-ja, si parti në pozitë, kurse në anën tjetër PDSH-ja si opozitë, ku përfshihet edhe PPD-ja? VEJSELI: Roli i PPD-së dallon nga rolet e partive të tjera politike, për shkak se ajo ka thënë se do të jetë dhe është konstruktive, e cila çështjet nuk do t'i shohë bardh e zi. Ka pasur shumë projekte qeveritare, që kanë qenë në dobi të shqiptarëve, të cilat i kemi përkrahur, sikundër që kemi qenë kundërshtarë të ashpër të projekteve që kanë qenë në dëm të shqiptarëve, pavarësisht nga kanë ardhur. Mendoj se partia në pushtet duhet të jetë paksa më guximtare në institucione dhe nuk duhet të lejojë që të tjerët të thonë se "ne jemi zot të vendit që quhet Maqedoni", por shqiptarët duhet të jenë ata që do t'i dalin zot hises së vet. Nuk mund të lejoj dhe të imagjinoj që partia maqedonase në pushtet, bartëse e koalicionit qeveritar, të thotë se Universiteti i Tetovës nuk është pjesë e Marrëveshjes së Ohrit, kur ai përfshihet në parimet themelore të saj. Tash del se ata u japin lëmoshë shqiptarëve, sepse edhe përkundër faktit se universiteti nuk qenka në këtë marrëveshje, ata lejojnë themelimin e tij. Ky problem gjatë kohë mbeti i hapur, ndërkohë që PPD-ja ishte një ndër themeluesit e universitetit, duke përkrahur iniciativën e intelektualëve shqiptarë për universitet. Në vitet e kaluara ka qenë shumë më vështirë të veprohet në qeveri, ndërsa sot punët kanë ndryshuar dhe duhet të jemi shumë më të guximshëm politikisht, që me hapa të shpejtuar të implementojmë barazinë tonë nacionale dhe qytetare. Nëse kemi parasysh konstatimin se shqiptarët në dy vjetët e fundit shumë shpejt kanë depërtuar në MPB dhe në armatë, duhet thënë se kjo është pjesë e Marrëveshjes së Ohrit, që siguron kyçjen e shqiptarëve në administratë. Ne do të pyetnim se sa shqiptarë ka në administratën e mbrojtjes dhe në atë të MPB-së. Atë që kemi, është pjesë e uniformuar, por aty ku udhëhiqet politika e këtyre institucioneve, numri është mjaft i vogël. Kemi ende institucione të pastra njënacionale, ku rezistohet pranimi i shqiptarëve, andaj partia në pushtet duhet të insistojë në përmirësimin e këtyre parametrave. Në gjyqësi, po ashtu, numri i shqiptarëve është mjaft i limituar. Kur në Tetovë apo Gostivar ka më shumë gjyqëtarë maqedonas, atëherë si do të arrijmë përqindjen e nevojshme në qytetet e tjera ku jetojnë shqiptarët. LOBI: Kështu si është skena e pikërishme politike në Maqedoni, do të pranonit ndonjë formë të koalicionit me LSDM-në për pjesëmarrje në qeveri? VEJSELI: Pjesëmarrja e PPD-së në qeveri gjithherë ka qenë spekulim medial, se sa vetë interesi i kësaj partie. Ne e dimë pozicionin tonë, jemi parti në opozitë dhe veprojmë nga pozicioni i opozitës, por nuk do të thotë se partitë nuk luftojnë për të marrë shumicën e votave dhe për të marrë pjesë në pushtet. Ne jemi aq sa jemi, në vitin 2002 morëm aq sa morëm deputetë, vetëm dy. Pjesëmarrjen tonë në Qeveri në këtë moment as që e kemi menduar dhe as që do të mendojmë, derisa nuk e marrim votën e popullit. Atëherë do të dimë në mënyrë të denjë ta përfaqësojmë atë. Tash jemi parti opozitare, por jo destruktive. LOBI: Si e vlerësoni implementimin e Marrëveshjes së Ohrit në kontekst të integrimeve euro-atlantike të Maqedonisë? VEJSELI: Këto integrime do të ndodhin edhe për Maqedoninë, e cila do të bëhet pjesë e strukturave të NATO-s dhe të BE-së kur do t'i përmbush kushtet e parapara. Kjo konsiston me impelmentimin e plotë të Marrëveshjes së Ohrit, reformat që duhet të realizohen në disa fusha të rëndësishme, si në gjyqësi, strukturimin e administratës shtetërore etj. Këto kushte duhet t'i përfill RM-ja nëse dëshiron të jetë anëtare e familjes evropiane dhe strukturave të NATO-s. Këtu hyn edhe çështja e sigurisë së RM-së, si dhe marrëveshjeve të tjera që duhet të ratifikohen me vendet e BE-së, ku hyjnë edhe raportet e mira me fqinjët, me Shqipërinë, Kosovën, Bullgarinë etj. Sa më herët që t'i plotësojë këto kushte, aq më mirë do të jetë për Maqedoninë dhe qytetarët e saj, për integrim në këto struktura, për çka ekziston një koncensus i plotë. LOBI: Në fund, ku e shihni PPD-në në kontekst të zhvillimeve politike dhe ekonomike të ndryshme nga standardet evropiane dhe marrëveshjet e arritura? VEJSELI: Nuk shoh ndonjë strategji ekonomike në Maqedoni për të dalë nga kjo krizë. Qeverisë së RM-së i nevojitet një koncensus pak më i gjerë, duke i pasur parasysh të gjitha propozimet, sugjerimet që vijnë nga partitë politike dhe ekspertë të ndryshëm, për të ndërtuar një strategji të mirëfilltë për dalje nga kriza. Nëse thellohet kriza, atëherë është e natyrshme se do të paraqitet një pakënaqësi te qytetarët, që do ta thellonte përkeqësimin e situatës, me demonstrime të qytetarëve në rrugë. PPD nuk dëshiron t'i shfrytëzojë këto pakënaqësi për qëllimet e veta, por dëshiron që në mbështetje të qytetarëve të realizojë platformën e saj për dalje nga kriza. Këtu kemi parasysh edhe zvarritjen e aprovimit të disa ligjeve që kanë bazën në Marrëveshjen e Ohrit, siç është ligji për gjuhën. Ne nuk e mohojmë faktin se në Maqedoni maqedonishtja është gjuhë zyrtare, por edhe maqedonasit nuk duhet ta mohojnë faktin se gjuha e dytë zyrtare në Maqedoni është gjuha shqipe. Në këtë aspekt duhet të ndërrohet mentaliteti te kampi politik maqedonas dhe të hiqet averzioni ndaj gjuhës shqipe.
|
| |
